داعش له طالبانو غوښتي چې د دوی له خلافت سره یو ځای شي

د رسنیو د راپورونو له مخې داعش ډلې په یوه تازه ویډیو کې له وسله والو طالبانو غوښتي، چې د دوی له خلافت سره یو ځای شي.
د جمهور آژانس د خبر له مخې په دغه ویډیو کې د ابو یاسر الاافغاني په نوم د داعش یوه ویاند ویلي، چې د طالبانو مشران د صالحو مسلمانانو له لارې منحرف شوي دي.
د داعش ویاند په دغه ویډیو کې پر افغان طالبانو له دې کبله نیوکه کړې چې په وینا یې د پاکستان له استخباراتي ادارې ای اېس ای سره اړیکې لري.
داعش په دې ویډیو کې له طالبانو غوښتي، چې د دوی له خلافت سره یو ځای شي او له مخالفته لاس واخلي.
خو وسله والو طالبانو تر اوسه په دې اړه څه نه دي ویلي، بلکې له دې وړاندې یې ویلي، چې د دوی تر کنټرول لاندې سیمو کې به بل هېڅ وسله والې ډلې ته د فعالیت اجازه ورنکړي.
داعش ډلې دغه ویډیو پر داسې مهال خپره کړې، چې څو ورځې وړاندې په ننګرهار ولایت کې د وسله والو طالبانو او داعش ډلې تر منځ نښتې رامنځ ته شوې.
دا لومړی ځل نه دی، چې د داعش او طالبانو تر منځ جګړې رامنځ ته کېږي او یا یو پر بل تورونه پورې کوي، بلکې له دې وړاندې هم څو څو ځلې په ننګرهار، زابل او فراه ولایتونو کې د طالبانو او داعش تر منځ نښتې شوې، چې درنده مرګ ژوبله یې هم له ځان سره لرله.
دغه راز تر دې وړاندې هم یادو ډلو یو پر بل تورنه پوري کړي او یو بل یې د اسلام او مسلمانونو له لارې منحرف بللي دي او یو پر بل یې د جهاد فتوا ورکړې وه.
جمهور آژانس:کابل