نړیواله ټولنه دې د افغانستان په کورنیو چارو کې لاسوهنه نه کوي

په ملګرو ملتونو کې د چین د دایمي استازي مرستیال وانګ مین وايي، نړیواله ټولنه دې د افغانستان په کورنیو چارو کې لاسوهنه نه کوي او د خپل امنیت او ثبات د عملي کولو له پاره دې د افغانستان له هڅو ملاتړ وکړي.
د جمهور آژانس د خبر له مخې ښاغلي مین دغه څرګندونې تېره ورځ د افغانستان د مسلې په اړه د ملګرو ملتونو جوړې شوې غونډې ته په وینا کې وکړه.
نوموړي په خپلو خبرو کې ویلي« نړيواله ټولنه بايد په عملي توګه د افغانستان د حاکميت، خپلواکۍ او د خاورې بشپړتيا درناوی وکړي، د افغانستان په کورنيو چارو کې دې لاسوهنه نه کوي او د خپل امنيت او ثبات د عملي کولو لپاره دې د افغانستان له کوښښونو ملاتړ وکړي.»
په افغانستان کې د سولې د راتګ له پاره ښاغلي وانګ مین دا هم ویلي، چې په افغانستان کې د سولې راتګ د دغه هېواد د ټولو سیاسي ډلو او نړیوالې ټولنې مرستې ته اړتیا لري او نړواله ټولنه باید په په پر له پسې توګه له افغانستان څخه ملاتړ او ور سره مرستې وکړي.
د مین په وینا، چين هيله لري چې د افغانستان بېلا بېلې سياسي ډلې د هېواد د ابادۍ او پرمختګ عمومي حالاتو ته لومړی اهميت ور کړي او د سياسي روغې جوړې په بهير کې دې فعال ګډون وکړي.
ده پر نړيواله ټولنه غږ کړی، چې بايد د افغان حکومت او طالبانو تر منځ د خبرو اترو د پرمخبيولو لپاره د بېلا بېلو خواوو له کوښښونو ملاتړ وکړي تر څو په افغانستان کې د روغې جوړې د عملي کېدو لپاره ګټوره زمينه جوړه کړي.
جمهورآژانس:کابل