ناټو په افغانستان کې د ټاک ماموریت تر ۲۰۱۶مه پورې وغځاوه

د ناټو غړو ۲۱ هېوادونو دفاع وزیرانو په یوه غونډه کې د ټاک (TAAC) ماموریت د ۲۰۱۶ کال تر پایه پورې وغځاوه.
د جمهور آژآنس د خبر له مخې په برلین کې د دغه ۲۱ هېوادونو دفاع وزیرانو چې د افغانستان په شمال کې د ناټو په چاوکاټ کې افغان ځواکونو ته روزنه او مشورې ورکوي، د یوې غونډې پر مهال دا پرېکړه کړې.
ټاک (TAAC) ماموریت په افغانستان کې د ناټو د غوڅ ملاتړ د ماموریت پروسې یوه برخه ده، چې موخه یې د افغان ځواکونو روزنه او هغوی ته مشورې ورکول دي.
په دغه غونډه کې د جرمني د دفاع وزیرې اورسولا وون در لیېن وویل«موږ موافق شو او دا یو ډیر ښه خبر دی چې موږ په افغانستان کې د امنیتي جوړښت د پیاوړتیا په ماموریت کې خپلې ونډې ته دوام ورکوو، دا یوه ډیره ښه نتیجه ده ځکه لا هم ډیر څه شته چې باید ترسره شي، موږ غواړو چې د قاطع ملاتړ ماموریت ته په ۲۰۱۶ میلادي کال کې هم دوام ورکړو.»
په ورته وخت کې د افغانستان د دفاع سرپرست وزیر معصوم ستانکزي چې په دې کنفرانس کې یې برخه لرله، خبریالانو ته وویل، چې وروستیو پېښو او مناسبتونو وښوده چې د ترهګرۍ نوې بڼې سره مبارزه پراخه نړېواله همکاري غواړي.
نوموړي زیاته کړه، چې په افغانستان کې وروستیو پېښو یو ځل بیا د نړېوالې همکارۍ د دوام اړتیا جوته کړه:
هغه په خپلو خبرو کې وویل«زه فکر کووم چې افغانستان د ډیرې مودې راهیسې کړیږي. له همدې کبله زه په دې باور یم چې همکاري او په افغانستان کې ثبات به په سیمه کې د پراخه ثبات سبب شي،همدارنګه به له افغانستانه د مغزونو د تيښتې مخه ونیول شي او د کډوالۍ ستونزه به کمه شي.»
دغه راز په افغانستان کې د ناټو عمومي قومندان امریکايي جنرال جان کېمپبل، په دې خبري غونډه کې د افغان امنیتي ځواکونو ستاینه وکړه او ویې ویل، چې د تېر اوړي جګړې ډېرې سختې جګړې وې او ما په کې د افغان ځواکونو پرمختګ ولید.
کېمپبل وویل"دوی ډیر مقاومت درلود،خو دا د جرمني او د روزنې، مشورې او ملاتړ په ماموریت کې د نورو برخه اخیستونکو او نورو مرسته کونکو هېوادونو له دومداره ملاتړ پرته ممکن نه دی.زه فکر کووم، نننۍ غونډه او هغه ژمنتیا چې ما د میز چاپیره ولیده د افغانستان د ملي یووالي حکومت، د افغانستان خلکو او د افغانستان ځواکونو ته قوي پیغام استوي.»
نوموړي وویل، چې دا غونډه وسله والو طالبانو ته هم یو پیغام دی چې نړېوال ایتلاف د افغانستان ملاتړ ته دوام ورکوي او دوی باید وسلې پر مځکه کېږدي او د سولې په پروسه کې شامل شي.
جمهور آژآنس:کابل