نتایج انتخابات هیئت رئیسه شورای ولایتی پروان، پنجشیر و کاپیسا

نتایج انتخابات درونی شوراهای ولایتی شمال کابل اعلام شد.
به گزارش خبرگزاری جمهور از شمال کابل، در ولایت پروان، غلام بهاءالدین جیلانی بار دوم بحیث رئیس شورا، امین الله شکوری به عنوان معاون و شمس الحق شیخانی به حیث منشی شورای ولایتی این ولایت در انتخابات درونی اعضای شورای ولایتی گزینش شدند.

همچنین در ولایت پنجشیر، عزم الدین میرزایی به حیث رئیس، راحله عطایی به عنوان معاون و قلندر بهادری به حیث منشی شورای ولایتی این ولایت انتخاب شدند.

در انتخابات هیئت رهبری شورای ولایتی در ولایت کاپیسا نیز، محمدحسین سنجنی به حیث رئیس، محمد محفوظ به حیث معاون و قاضی محمد امان مبارز بعنوان منشی شورای ولایتی کاپیسا برنده اعلام شدند.

عبدالقاهر وهاب صافی رئیس دفتر ولایتی کمیسیون انتخابات ولایت پروان به خبرگزاری جمهور گفت: "انتخابات بصورت شفاف برگزار شد و غلام بهاءالدین جیلانی رقیب نداشت و با کسب ۱۲ رای دوباره رئیس اتنخاب شد و همچنین امین شکوری معاون و شمس الحق شیخانی منشی انتخاب شدند"
غلام بهاءالدین جیلانی رئیس منتخب شورای ولایتی پروان که بار دوم از سوی اعضای شورای ولایتی به رهبری این شورا راه یافته است برای خدمتگذاری بیشتر برای مردم تعهد سپرد

گفتنی است همه سال انتخابات میان اعضای شوراهای ولایتی بخاطر انتخاب رؤسا، معاونین و منشی ها برگزار می شود.

خبرگزاری جمهور - ولایت پروان