د اوکرایني الوتکې د لوېدو په پېښه کې ۷ افغانان وژل شوي

لوېدیځې رسنۍ وايي، د اوکراین یوه ملکي هلي کوپتر سلواکیا هېواد کې غورځېدلې، چې له امله یې د ۷ افغانانو په ګډون ۸ تنه په کې وژل شوي دي.
د جمهور آژانس د خبر له مخې رویټرز خبري آژانس تېره ورځ رپوټ ورکړی، چې دغه اوکرایني چورلکه د تېرې چهار شبنې په ورځ د سلواکیا حریم ته له داخلېدو وروسته غورځېدلې ده.
دغه آژآنس زیاته کړې، چې په دې چورلکه کې ټول ۸ تنه سپاره و، چې ۷ تنه یې افغانان او یو یې هم د چورلکې اوکرایني پیلوټ وو.
د رپوټ پر بنسټ د پېښې په ځای کې له اسنادو چې په افغاني ژبو لیکل شوي، ښکاري چې قربانیان افغانان دي، چې پنځه یې نارینه او دوه یې هم مېرمنې دي.
سلواکي چارواکو هم د دې خبر پخلی کړی او ویلي یې دي، چې د چهارشنبې په شپه د دغه هیواد په هوايي حریم کې د یوې ناپېژندل شوې څرخکې څرک ولګېد.
د سلواکیا د کورنیو چارو وزارت ویندوی ایوان نیتیک وویل، مامورینو د هیلي کوپتر د لوېدو په سیمه کې لټون په هماغه لومړیو کې پیل کړ خو د لړې د زیاتوالي له کبله هیلي کوپتر د جمعې په ورځ وموندل شوه.
ده همداراز وویل:«ایم آی -۲ هیلي کوپتر، چې د اوکراین نښان پرې لګېدلی، په داسي حال کې ټیټ الوت کاوه چې هوا خرابه وه، لکه چې د دې لپاره یې ټیټ پرواز کاوه چې کشف نه شي.»
اوکرایني چارواکو نه ده تایید کړې چې الوتکه د دغه هیواد له پولې اوښتې ده.
جمهور آژآنس:کابل