د خیبرپښتونخوا حکومت د پښتني کلتور خلاف عمل وکړ

د عوامي نشنل ګوند د عمران خان د تحریک انصاف ایالتي حکومت په دې وغانده چې د مېلمستون د رسمي پرانستنې لپاره د افغانستان د ملي شورا او کابینې غړیو ته اجازه نه ورکوي.
د جمهور آژآنس د خبر له مخې د عوامي نشنل ګوند د اطلاعاتو عمومي ريیس زاهد خان د دوشنبې په ورځ رسنیو ته وویل، چې د تحریک انصاف ایالتي حکومت دغه کړنه د پښتني کلتور خلاف عمل دی.
نوموړي ویلي، چې د افغانستان د ملي شورا او کابینې یو شمېر غړي پېښور ته راغلي چې د پخواني صوبايي وزیر او د عوامي نشنل ګوند غړي افضل خان لالا پر مړینه غمرازي وکړي.
خو په وینا یې د تحریک انصاف ګوند حکومت د دوی هرکلی ونه کړ چې دا د پښتونولۍ او پښتني کلتور خلاف کار دی.
زاهد خان وویل، د خیبرپښتونخوا اعلي وزیر پروېزخټک اجازه ورنه کړه چې مېلمستون رسماً پرانستل شی.
باید وویل شي، چې د افغان حکومت د اجرائیه ریاست د لومړي مرستیال انجینر محمد خان په مشرۍ د افغان حکومت، ولسي جرګې، قومي مشرانو او بانفوذه اشخاصو یو پلاوی د پښتون مشر ارواښاد افضل خان لالا په فاتحه کې ګډون پاکستان ته تللی.
جمهور آژآنس:کابل