امریکا وايي په سوریه کې خپل هوایې بریدونه زیاتوي

د امریکا دفاع وزارت وايي، هېواد به یې په راتلونکو اونیو کې په سوریه کې خپلې هوايي حملې زیاتې کړي او په دې توګه داعش ډله وځپي.
د جمهور آژآنس د خبر له مخې دا خبره د امریکا دفاع وزیر اشټون کارتر تېره ورځ د امریکا د سنا مجلس د پوځي خدماتو په کمېټه کې کړې ده.
نوموړي زیاته کړې، چې متحده ایالات غواړي د سوریې رقه ښار او د عراق رمادي ښار چې د داعش ډلې مهم مرکزونه بلل کېږي په نښه او تر فشار لاندې یې راولي.
د امریکا دفاع وزیر وویل«موږ په پام کې لرو د هوا له لارې خپل بریدونه ډیر کړو، البته د ایتلاف ځواکونو د الوتکو په کارولو سره به د داعش پر وړاندې هوایي بریدونه ډیر او زورور شي.د معلوماتو په ښه کیدو سره به د داعش مهم اهداف چې د هغوی د مالي شبکې اصلي ستون یعنې د نفتو شبکه هم په کې شامله ده، په نښه شي.»
کارټر دا هم ویلي، چې په سوریې او عراق کې به د امریکا عملیات د روسیې د هوایې بریدونو تر اغیز لاندې رانه شي امریکا نه غواړي په دې اقدام سره له روسیې سره همکاري وکړي.
ده زیاته کړې، چې امریکا ځکه په دې برخه کې له روسیې سره همکاري نه کوي، چې په وینا یې روسیه په حقیقت کې په سوریې کې د حکومت د مخالفینو ډلې په نښه کوي او دا کار د سوریې کورنۍ جګړه لا ډیروي.
باید وویل شي، چې د امریکا په مشرۍ ایتلاف له یوه کال راهیسې په سوریې کې د داعش ډلې په وړاندې هوایې بریدونه پیل کړي دي، خو له دې سره-سره د جګړو په ډګر کې کوم توپیر نه دی راغلی.
جمهور آژانس:کابل