افغانستان کرکټ کې پر زیمیابوې بل ریکارډ جوړ کړ

د کرکټ په تاریخ کې افغانستان یو ځل بیا یو ریکارډ جوړ کړ او په نړیواله شل اوریزه لوبه کې یې زمبابوې ته سخته ماته ورکړه.
د جمهور آژآنس د خبر له مخې د افغانستان او زمبابوې تر منځ دغه شل اوریزه لوبه تېره ورځ تر سره شوه، چې د لومړی زمبابوې توپ وهنه وکړه او په ټاکلو شلو اورونو کې د ۵ لوبغاړو په سوځېدو سره ۱۵۳ منډې وکړې او افغانستان ته یې ۱۵۴ هدف وټاکه.
د افغانستان له لوري دولت ځدراڼ او راشد ارمان ښه توپ اچونه وکړه، چې دولت په څلورو اورونو کې ۲۹ منډې ورکړې او ۳ لوبغاړي یې وسوځول او راشد خان بیا په ۴ اورونو کې ۲۰ مندې ورکړې او ۱ لوبغاړی یې وسوځاوه.
د توپ وهنې په برخه کې افغانستان په ۱۹.۱ اور کې وتوانېده، چې ورکړای شوی ۱۵۴ هدف پوره او زمبابوې ته ماته ورکړي.
د توپ وهنې په برخه کې شهزاد، په ۲۱ توپونو ۳۴ منډې،عثمان غني په ۱۸ توپونو ۱۳ منډې، کریم صادق په ۱۶ توپونو ۱۷ منډې، اصغر ستانکزي په ۹ توپونو ۱۸ منډې، محمد نبي په ۲۴ توپونو ۳۳ او نجیب ځدراڼ په ۲۵ توپونو ۳۷ منډې وکړې، چې نبي او نجیب د دوه لویو لوو شپږیزو په وهلو سره ناسوځېدلي پاتې شول.
افغانستان یو ځل بیا ځکه د کرکټ په تاریخ کې یوه بله پاڼه واړوله، چې دا لومړی ځل دی، چې یو دوهمه درجه هېواد له لومړۍ درجه هېواد څخه شل اوریزه نړیواله لوبه ګټي.
افغانستان تر دې دوه ورځې وړاندې د کرکټ په ۲۰۰ کلن تاریخ کې یو بل ریکارډ هم جوړ کړی او هغه دا چې له زمبابوې ملي لوبډلې یې په پنځوس اوریزه سیالیو کې هم جام خپل کړ او د لومړي ځل له پاره یې یوه پول میمبر یا د کرکټ د نړیوالې شورا بشپړ غړي لرونکي هېواد ته یې ماته ورکړه.
باید وویل شي، چې افغانستان سبا ته له زمبابوې سره یوه بله شل اوریزه او وروستۍ لوبه هم لري، چې له دې لوبې وروسته به ملي لوبډله کور ته ستنېږي او دلته به د شپږیز سیالۍ تر سره کوي.
جمهور آژانس:کابل