د هلمند د باباجي د جګړې رهبري کوونکی طالب قوماندان وژل شوی

چارواکي وایي، د هلمند ولایت د باباجي سیمې د جګړې لارښود طالب قوماندان ملا عبدالغني له درې نورو ملګرو سره یو ځای په مخامخ نښته کې وژل شوی دی.
د جمهور آژآنس د خبر له مخې طالبانو د سه شنبې په ورځ د هلمند مرکز لښکرګاه ته نېږدې په باباجي سیمو کې د افغان ځواکونو پر پوستو حمله وکړه او دغه سیمې د یوې ورځې له پاره ونیوې.
د طالبانو له برید سره سم له کندهاره هم دغه جګړې ته د جنرال رازق په مشرۍ تازه دمه سرتېري ورسېدل او د هملند له ځواکونو سره یې یو ځای پر وسله والو عملیات پیل کړل.
د امنيي قومندانۍ د مطبوعاتو مسؤول شامحمود اشناد وايي، د باباجي، د لوى مانده، لوچک، کوپکي او شاوخوا سيمو کې جګړه اوس هم روانه ده او ځینې سیمې بېرته له وسله والو نیول شوې.
نوموړی وايي، چې د باباجي په جګړه کې د طالبانو د جګړې رهبري کوونکی قوماندان ملا عبدالغني له دریو ملګرو سره یو ځای د امنیتي ځواکونو سره په مخامخ جګړه کې وژل شوی او څلور نور ملګري یې ټپیان شوي دي.
د هغه د مالوماتو پراساس چې ملا عبدالغني په سيمه کې د جګړي رهبري کول او د جګړي پر مهال زيات فعال کس هم وو.
بل خوا د افغانستان د ملي امنیت لوی ریاست وايي، د دې رياست منسوبینو د یو لړ ځانګړو عملیاتو په ترڅ کې د محب الله په نوم د وسله والو يو قومندان د خپلې شپږ کسيزي ډلې سره یو ځای په کندهار ولایت کې نیولی دی.
په خبرپاڼه کې راغلي چې نیول شوي کسان شمس الله د دستګیر زوی، محمد علي د محمد حسن زوی، شریف الله د محمد ظاهر زوی، احمد الله د محمد ظاهر زوی، عبدالله د عطاالله زوی، بورګل د محمد جمعه زوی دی.
سرچینې زیاته کړې، چې یادو کسانو په کندهار ښار کې د دولت پر ضد فعاليتونه او هلته د قومي مشرانو او نورو باندې غلچکي بريدونه کې لاس درلود.
تر اوسه وسله والو طالبانو په دې اړه څه نه دي ویلي.
جمهور آژآنس:هلمند