کندهار کې د القاعده مهم مرکز له منځه وړل شوی

افغان او امریکايي پوځیان وايي، په کندهار ولایت کې یې د ګډو عملیاتو پر مهال د القاعده شبکې یو روزنیز مرکز له منځه وړی او په لسګونو وسله والو ته یې مرګ ژوبله اړولې.
د جمهور آژآنس د خبر له مخې افغان او امریکايي ځواکونو دغه عملیات وړمه ورځ د کندهار ولایت په شورابک ولسوالۍ کې تر سره کړي دي.
په افغانستان کې د امریکايي ځواکونو ویاند بریدجنرال ویلس شوفنر وايي، په دې عملیاتو کې ۲۰۰ افغان او امریکايي ځواکونو برخه درلوده.
نوموړي زیاته کړه، چې امریکايي ځواکونو ۶۳ هوايي، بریدونه وکړل او په وینا یې دا د دوی تر ټولو ستر ګډ عملیاتو، چې اوسه پورې یې په افغانستان کې تر سره کړي دي.
بریدجنرال شوفنر وايي، د دې عملیاتو هدف د تروریستي شبکې د ریښو وچول و چې په خبره یې د طالبانو په تاریخي مرکز کې یې د القاعده شبکې دغه پتنځایه له منځه وړی دی.
د شوفنر په وینا په دې عملیاتو کې افغان امنیتي خواکونو خپل خورا لوړ مهارت او مسلکي توب وښود او په دغه عملیاتو کې لسګونه ترهګر په کې و وژل شول.
د عملیاتو په لړ کې امنیتي خواکونو هوا ضد وسلې، راکټونه، بمونه، د بم جوړولو وسایل، پاسپورټونه، لپ ټاپونه، ټېلفونونه او نور وسایل نیولي دي.
باید وویل شي، چې د افغانستان د دفاع وزارت ویاند دولت وزیري هم وړمه ورځ په خري غونډه کې وویل چې د شورابک په عملیاتو کې ۲۳۴ ترهګر وژل شوي دي.
تر دې وړاندې بیا د کندهار ولایتي چارواکو هم ویلي و، چې شورابک ولسوالۍ کې ډېورنډ کرښې ته څېرمه پر وسله والو هوايي بریدونه شوي، چې په کې لسګونه وسله والو ته مرګ ژوبله اوښتې ده.
جمهور آژانس:کندهار