د طالبانو د اسلامي امارت شورا نوی مشر ټاکي

د طالبانو د کوټې شورا یو شمېر غړي وايي، ډېر ژر به د پخواني مشر ملامحمد عمر اخوند پر ځای نوی مشر اعلان کړي.
د جمهور آژانس د خبر له مخې په یوه اعلامیه کې، چې د افغانستان د اسلامي امارت د عالي شورا له لوري عبدالمنان نیازي رسنیو ته لېږلې، ویل شوي چې دې شورا د نوي زعیم د ټاکلو په هکله د پنجشنبې په ورځ غونډه وکړه.
په دغه اعلامیه کې ویل شوي، چې د اسلامي امارت عالي شورا په دې غونده کې پرېکړه وکړه چې ژر به د ټولو علماوو، جهادي قومندانانو، قومي مخورو او د اسلامي امارت د ټولو استازو او مجاهدینو په ګډون نوی زعیم وټاکي.
د اسلامي امارت عالي شورا په خبرپاڼه کې ویلي، مخکې ټاکل شوې وه چې شورا به له لوی اختر سمدستي وروسته د نوي مشر د ټاکلو په اړه پرېکړه کوي، خو د مصروفیتونو له کبله دا پرېکړه ځنډېدلې ده.
باید وویل شي، د افغانستان د اسلامي امارت عالي شورا چې ملا عبدالمنان نیازی یې ویندويي کوي، د ملا اختر محمد منصور د مشرۍ مخالفت کوي.
دغه مخالفې ډلې ویلي، چې ملا اختر محمد منصور د طالبانو د مشرتابه شورا د غړیو د اکثریت ملاتړ نه لري او د پاکستان په زور پر طالبانو تپل شوی دی.
جمهور آژآنس:کابل