وسله والو لوګر کې د نجونو ۲۸مدرسې او ښوونځي تړلي

د لوګر د پوهنې ریاست چارواکي وايي، وسله والو طالبانو په لوګر ولایت کې د نجونو ۸ مدرسې او ۲۰ ښوونځي تړلي دي.
د جمهور آژانس د خبر له مخې د لوګر د پوهنې ریاست نه خپره شوې خبرپاڼه زیاتوي، چې وسله والو د دغه مدرسو او ښوونځيو ډېری یې د برکي برک ولسوالۍ په شاوخوا سیمو کې تړلي.
په ورته وخت کې د لوګر والي محمد حلیم فدايي وايي، وسله وال مخالفین د افغان ځواکونو پر وړاندې د مقابلې توان نه لري او عامه ځایو ته د زیان رسولو له لارې غواړي خپل شتون وښيي.
هغه زیاته کړې«مخالفین د امنیتي ځواکونو پر وړاندې د مقابلې توان نه لري، دوی خپل محبوبیت له لاسه ورکړی اوس غواړي چې غیر نظامي هدفونه لکه عامه شتمنۍ، ښوونځى او مدارس، جماعتونه او د ولس عام وګړي په نښه او تهديد کړي تر څو له دې لارې په ولس کې ویره خپره کړي او خپل حضور ثابت کړي »
د لوګر د والي په خبره د طالبانو دغه ډول عملونه د دوی د کمزورۍ نښه ده نه د قوت.
ښاغلي فدايي زیاتوي، چې د ولایت مقام په دې اړه له ولسي مشرانو او مخورو سره خبرې پیل کړي تر څو د مدارسو او ښوونځیو پرانستلو او ساتلو جامع حل لار را وباسي.
 هغه له ولس نه وغوښتل، چې د خپلو اولادونو برخلیک ته پاملرنه وکړي او او د جهالت څخه د راویستلو په لار کې بې تفاوته پاتې نشي
په لوګر کې دغه ښوونځي او مدرسې پر داسې مهال تړل شوې، چې هلته د افغانستان په ختیځ ننګرهار ولایت کې بیا داعش وسله والو ۵۶ ښوونځي تړلي چې ورسره زرګونه زده کوونکي له زده کړو بې برخې شوي دی.
جمهور آژآنس: لوګر