افغانستان دې د پاکستان په اړه نړیوالو ته شکایت نه کوي

د پاکستان د کورنیو چارو وزیر چوهدري نثار علي خان وايي، افغانستان دې د پاکستان په اړه نورو هېوادونو ته شکایت نه کوي، بلکې خپلې اندېښنې دې له موږ سره شریکې کړي.
د جمهور آژآنس د خبر له مخې علي خان تېره ورځ په یوه خبري غونده کې وویل چې پاکستان په افغانستان کې د هرې پېښې مسؤول نه دی.
هغه د کندوز پېښې ته په اشارې سره زیاته کړې، چې دغه موضوع د افغانستان کورنۍ مشکل دی او پاکستان په کې لاس نه لري.
نثار علي خان وویل«موږ د افغانستان څوکیداران نه یوو او نه د اشرف غني په ګډون بل چا ته ځواب ورکوونکي یوو. په افغانستان کې که څوک وپرنجېږي هم نو تور یې پر پاکستان لګوي، افغانستان دې خپلې اندېښنې زموږ سره شریکې کړي، موږ تیار یوو چې د دوی خبرې واورو.»
د پاکستان د کورنیو چارو وزیر دغه څرګندونې پر داسې مهال کوي، چې تېره ورځ افغان ولسمشر محمد اشرف غني په یوه غونده کې وویل چې هر ځل افغانستان په ملګرو ملتونو کې د پاکستان په اړه یو معقول دریځ نیولی، په افغانستان کې یوه پېښه رامنځ ته شوې ده.
هغه زیاته کړه، دا چې د افغان حکومت اجرائیه رییس ډاکتر عبدالله عبدالله د ملګرو ملتونو په غونډه کې د افغانستان له ملي منافعو دفاع وکړه او له ترهګرۍ سره یې پر صادقانه مبارزه ټينګار وکړ، په افغانستان کې جګړې زور واخیست.
باید وویل شي ډاکتر عبدالله عبدالله چې لا هم په نیویارک کې دی، څو ورځې وړاندې د ملګرو ملتونو په غونډه کې وویل چې حقاني شبکه د ټولې نړۍ له پاره لوی خطر دی.
ښاغلي عبدالله وویل چې نړیوال پوهیږي چې د تروریستانو ځالې چیرته دي، څوک یې روزي او له کومه ځایه رهبري کیږي. خو ټینګار یې وکړ چې دا خبرې په دې معنی نه دي چې افغانستان له چا سره دښمني لري.
جمهور آژآنس:کابل