د سرتاج عزیز څرګندونې پر افغانستان ښکاره لفظي تېری دی

د افغانستان د ولسي جرګې یو شمېر غړي او ځیني سیاسي شنوونکي وايي، د پاکستان د ملي امنیت سلاکار سرتاج عزیز دا څرګندونې چې د بډه بېرې د پېښې په اړه افغانستان ته شواهد سپاري، پر افغانستان ښکار لفظي تېری او یو بې بنسټه تور بولي.
د جمهور آژانس د خبر له مخې د پېښور په بډه بېره کې د پاکستان پر یوه هوايي اډه وړمه ورځ د وسله والو له خوا برید وشو، چې نېږدې ۶۰ تنو ته په کې مرګ ژوبله واوښته.
تر پېښې وروسته که څه هم د برید مسؤولیت پاکستاني طالبانو پر غاړه واخیست، خو د پاکستان پوځ او نورو لوړ پوړو پاکستاني چارواکو تور پورې کړ، چې د دغه برید پلان په افغانستان کې طرحه شوی وو.
د پاکستان دفاع وزیر خواجه اصف ادعا وکړه، چې پاکستان په خپله خاوره کې د افغانستان دوښمنان په نښه کړي، خو په وینا یې افغانستان په دې چاره کې پاتې راغلی دی.
خو افغان شنوونکي وايي د خواجه اصف دغه څرګندونې یو تهمت بولي او وايي پاکستان ولي په خپله خاوره کې د افغان ترهګرو پر وړاندې، چې په ښکاره په کوټه، پېښور او نورو سیمو کې غونډې کوي، د مشرتابه پر سر لانجې هواروي، افغانستان ته ترهګر، پیسې، او وسلې لېږي، اقدام نه کوي.
په همدې تړاو د پاکستان د ملي امنیت سلاکار سرتاج عزیز تېره ورځ د دغه هېواد له یوه تلوېزیون سره په مرکه کې ویلي، چې پاکستان به د بډه بېرې پر هوايي اډې د طالبانو د حملې په اړه افغانستان ته خپل شواهد وړاندې کړي.
خو په ولسي جرګه کې د پکتیکا ولایت استازی نادرخان کټوازی د سرتاج عزیز دغه څرګندونې پر افغانستان ښکار لفظي تېری او بې بنسټه ادعا بولي.

ښاغلي نادرخان ګټوازي جمهور آژانس ته وویل«د افغانستان حکومت او ولس په وار وار ویلي، چې په خپله خاوره کې به ترهګرو ته ځای نه ورکوي او نه به یې خاوره د بل ګاونډي هېواد په ضد کارول کېږي، بل دا چې افغانستان کله دومره توان لري، چې په پاکستان کې ورته پلانونه طرحه کړي، موږ خپل د ترهګرۍ قرباني یو، پاکستان په دغه ډول څرګندونو غواړي خپل هغه پل پټي کړي، چې له ترهګرو سره مرستې کوي، د افغانستان د ورانۍ پلانونه یې په خاوره کې طرحه کېږي، تاسې وګورۍ د پاکستان پوځیان او ملېشې د افغانستان په جګړه کې نیول شوې او وژل شوې او بل دا چې د پاکستان په خاوره کې د ترهګرو ښکاره مرکزونه دي، هلته علني غونډې کوي، هلته مشران ټاکي، ټوله نړۍ پر دې پوهېږي، چې د افغانستان د ورانۍ ټول پلانونه په پاکستان کې جوړېږي، نو پاکستان غواړي په دې ډول څرګندونو خپل پل پټي کړي او نړۍ ته داسې وښيي، چې دوی هم د ترهګرۍ قرباني دي.»

ښاغلي ګټوازي د دغه پوښتې په اړه چې پاکستان وايي د بډه بېرې د پېښې پلان په افغانستان کې جوړ شوی وویل«هو رښتیا دوی به د افغانستان هغه سیمې ښيي، چې د ډېورنډ کرښې پورې غاړې دي، لکه وزیرستان، خیبرپښتونخوا او داسې نور په هغه سیمو کې ښايي دا پلان طرحه شوی وي، خو دا سیمې خو هم د دوی تر کنټرول لاندې دي، نو له دې ښکاري، چې پاکستان د ډېورنډ کرښې پورې غاړې د ترهګرو پر وړاندې صادقانه مبارزه نه ده کړې.»
ښاغلي کټوازي زیاته کړه، چې نړیواله ټولنه باید د پاکستان په دغه څرګندونو او دوه مخي سیاست تېر نه وزي بلکې پر دغه هېواد باید فشار راوي، چې په خپله خاوره کې د ترهګرو مرکزونه او د تمویل سرچینې له منځه یوسي او د سیمې د سولې او ثبات په برخه کې صادقانه ګامونه پورته کړي.
ده په نړیواله ټونه هم نیوکه وکړه، چې په وینا یې په حقیقت پوهېږي، خو په ځینو مواردو کې یې د خپلو ګټو او ځینو مجبوریتونو له امله سترګې پټې کړې.
نوموړی وايي، پاکستان دوه لارې لاري یا به په خپله خاوره کې د ترهګرو د تجهیر او تمویل مرکزونه له منځه وړي، له ترهګرۍ سره به صادقانه مبارزه کوي او یا هم دا چې له نړیوالې انزاو سره به مخ کېږي.
په ولسي جرګه کې د کنړ ولایت استازی حاجي صالح محمد صالح هم ورته نظر لري او وايي، دا تر لمر روښانه ده، چې افغانستان له یوې نااعلان شوې جګړې سره لاس او ګرېوان دی او دا یو روڼ حقیقت دی، چې د دې جګړې تر شاه د یوه هېواد لاس دی او ترهګر له قوي ملاتړ څخه برخمن دي.
نوموړی بیا د پړې ګوته تر ډېره نړیوالې ټولنې او افغانستان کې د امریکا په مشرۍ راغلو ناټو هېوادونو ته نیسي او جمهور آژآنس ته یې وویل«نړیواله ټولنه، ناټو او په تېره امریکا پر دې ښه پوهېږي، چې د ترهګرو مرکزونه چېرته دي، له کومه ځایه تجهیز او تمویل کېږي، د ترهګرو مشران چېرته دي، چېرته و وژل شول او چېرته مړه شول، خو بیا یې هم سترګې پرې پټې کړې او فشار نه پرې راوړي، اصلي ستونزه په همدوی کې ده، زموږ ګیله له همدوی نه ده، دوی زموږ سره په کړو ژمنو او تړونونو عمل نه دی کړی.»
پر همدې مهال د ولسي جرګې یو بل تن غړی دواد کلکاني له رسنیو سره په خبرو کې وویل چې پاکستان په لابي ګرۍ کې ډېر تکړه دی او په دغه دول تورونو او څرګندونو غواړي د نړیوالې ټولنې فشار پر ځان راکم کړي.
د نوموړي په وینا دا چې په نېږدې کې د ملګرو ملتونو نړیوال کنفرانس جوړېدونکی دی، پاکستان غواړي له دې فرست څخه ګټه پورته کړي او په نړیواله کچه افغانستان تر سوال لاندې راولي او خپل پل پتي کړي.
باید وویل شي، چې د بډه بېرې د پېښې په تړاو د پاکستاني چارواکو تورونه د افغان حکومت له خوا هم په کلکه رد شوي دي.
د افغانستان د بهرنیو چارو وزارت وايي، افغان حکومت په خپله خاوره کې هېڅ ترهګر ته اجازه نه ورکړې او نه یې ورکوي، چې افغان خاوره د کوم ګاونډي هېواد پر ضد وکاروي.
د افغانستان د بهرنیو چارو وزارت زیاتوي، چې افغانستان د تېرو ۱۴ کلونو راهیسې د ترهګرۍ قرباني دی او په دې برخه کې لا هم قرباني ورکوي او صادقانه مبارزه کوي.
جمهور آژآنس:کابل