افغانستان له ترکمنستان سره د دوامدارو همکاریو غوښتونکی دی

ولسمشر محمد اشرف غني وايي، افغانستان له ترکمنستان سره د دوامداره همکاریو غوښتونکی دی او تمه ده، چې افغانستان ته د ترکمنستان د ولسمشر په سفر سره د ټاپي پروژې د تمدید موضوع نهايي شي.
د جمهور آژآنس د خبر له مخې ولسمشر دغه څرګندونې تېره ورځ د ترکمنستان د وزیرانو شورا د مرستیال او د بهرنیو چارو د وزیر رشید مردوف په مشرۍ د دغه هېواد له یوه پلاوي سره په کتنه کې کړې دي.
د ولسمشرۍ مطبوعاتي دفتر وايي ښاغلي غني ترکمنستان د افغانستان ستر اقتصادي شریک وباله او تمه یې وښوده، چې د د ازبکستان د ولسمشر په سفر کې به د ټاپي پروژې د تمدید موضوع نهايي شي.
سرچینه وایي، ولسمشر په خپلو خبرو کې وویل چې افغانستان له ترکمنستان سره د دوامدارو همکاریو غوښتونکیدی او غواړي چې افغانستان ته د ترکمنستان د جمهور رئیس د کېدونکي سفر په جریان کې د برېښنا د لېږد، د افغانستان، ترکمنستان او ایران ترمنځ د ګډې اوسپنې پټلۍ د پروژې، د افغانستان، ترکمنستان او تاجکستان ترمنځ د ګډې اوسپنې پټلۍ، نفتو او ګازو په برخو کې د همکاریو په اړه بحث او خبرې وکړو.
د خبرپاڼې د معلوکاتو له مخې ولسمشر ویلي چې د شانګهای د همکاریو د سازمان او د بریکس په ناستوکې د افغانستان، هند او ترکمنستان ترمنځ موافقه وشوه چې د دغو هېوادونو ترمنځ دې د ګازو د پایپ لاین د تمدید کار پیل شي.
ولسمشر غني زیاته کړې، چې غواړي دغه موضوع افغانستان ته د ترکمنستان د جمهور رئیس د سفر په لړ کې له هغه سره نهایي کړي.
جمهور آژآنس:کابل