قطر کې د طالبانو د سیاسي دفتر مشر استعفی کړې ده

خبری سرچینې وايي، په قطر کې د طالبانو د سیاسي دفتر مشر سید طیب آغا استعفی ورکړې، خو د طالبانو د رهبري شورا له خوا تر اوسه نه ده منل شوې.
د جمهور آژآنس د خبر له مخې دغه څرګندونې ځینو طالب سرچینو افغان اسلامي آژانس ته کړې او ویلي یې دي، سید طیب اغا وروسته له دې استعفی کړې چې طالب مشرانو د قطر له استازو پرته په پاکستان کې د افغان حکومت له استازو سره خبرې کړې.
دغه آژانس د طالبانو د ځینو سرچینو له قوله ویلي چې د طیب اغا استعفا د طالبانو رهبرۍ شورا ته رسیدلې؛ خو تر اوسه منظوره شوې نده.
افغان اسلامي آژآنس دغه راز ویلي کله چې د سعودي حکومت د مذاکراتو سره د طيب اغا له مخالفته خبر شو، نو هغه يې سعودي ته ور وغوښت او خبرو ته يې قانع کړ، چې اوس ويل کيږي، له دې وروسته دورو مذاکراتو کې به د قطر دفتر هم ګډون وکړي.
د قطر د سیاسي دفتر د مشر طیب آغا د استعفی خبر پر داسې مهال رسنیو ته راوځي، چې ټاکل شوې د افغان حکومت او طالبانو استازي د سولې په تړاو دوهمه غونده د راتلونکې جمعې په ورځ په پاکستان کې وکړي.
که څه هم په لومړي سر کې ویل کېدل، چې دغه غونډه ښايي په چین کې تر سره شي، خو پاکستاني چارواکو د دغه هېواد رسنیو ته ویلي و، چې د سولې په تړاو غونده نه په چین، نه په قطر بلکې په پاکستان کې به تر سره شي.
پاکستاني چارواکو دا هم ویلي، په دې غونډه کې به لوړپوړي طالب چارواکي کډون وکړي او کېدای شي، په دې غونډه کې دواړه لوري پر اوربند هوکړې ته سره ورېږي.
د طالبانو ځینو مشرانو هم رسنیو ته ویلي و، چې د سولې د دوهم پړاو خبرو له پاره یې په لوړه کچه ترتیبات نیولي دي.
په ورته وخت کې د افغان حکومت استازي هم وایي، چې د سولې په دوهم غونډه کې به په پر اوربند خبرې وشي.
جمهور آژآنس:کابل