په افغانستان کې داعش نشته

په افغانستان

کې د امریکا په مشرۍ د نړیوالو ځواکونو امریکايي قوماندان جنرال جان کمبيل وايي، کره اسخباراتي معلومات نشته، چې په افغانستان کې د داعش ډلې فعالیتونه وښي.
د جمهور آژآنس د خبر له مخې جنرال کمبيل دغه څرګندونې د امریکا او افغانستان تر منځ د امنیتي تړون له لاسلیک وروسته له بي بي سي سره په مرکه کې کړې دي.
دغه امريکايي قوماندان وايي کره استخباراتي معلومات وجود نه لري، چې په افغانستان کې د اسلامي دولت د ډلې د فعاليتونو پخلى وکړي.
نوموړي په ورته وخت کې دا هم وویل، چې د افغانستان په ځینو سیمو کې له نښتو وروسته د ملکي خلکو د سرغوڅولو دوامداره اوازې هم سمې نه دي. 
دا په داسې حال کې ده، چې څو ورځې وړاندې د غزني ولایت په اجریستان ولسوالۍ کې وسله والو د دغه ولسوالۍ د نیولو په موخه برید وکړ.
د سیمې خلکو ویل چې وسله والو په دغه سیمه کې له پنځلسو تنو سرونه پرې کړي او ګڼو کورونو ته یې اور ورته کړی دی.
دوی ویل چې دغه وسله وال ځانونه د داعش ډلې جنګیالي بولي، چې دا خبره د غزي ځیني چارواکو هم تایید کړه.
خو په افغانستان کې امریکايي جنرال وايي،«زه په دې تړاو هېڅ پوځي رپوټ نه لرم، له رسنیو مې د ډله ییزو وژنو او سرغوڅولو په اړه اوریدلي دي،چې یو یې هم نه شو تاییدولاى. ما په افغانستان کې د اسلامي دولت د حضور په اړه هېڅ کره رپوټ نه دی لیدلی. خو موږ به د نړۍ په نورو برخو کې د دې ډلې فعالیتونو ته په کتو دا موضوع څارو، خو یو ځل بیا وایم چې په افغانستان کې مو تراوسه داسې څه نه دي لیدلي.»
جنرال کمبيل په ورته وخت کې د طالبانو دغه خوځښتونه جدي نه بولي او وايي امنيتي تړون بايد هغوى ته روښانه پيغام ورکړي، چې افغان پوځ له کلک ملاتړه برخمن دى
هغه په خپله مرکه کې ویلي«طالبانو مخکې تګ نه دی کړی، هغه څه چې زه پرې پوهېږم آن د دې ډلې مشران هم په افغانستان کې نشته، فکر کوم چې د امنیتي تړون لاسلیکېدل باید طالبان ځیر کړي چې ایتلافي ځواکونه او نړیواله ټولنه دلته له افغان ځواکونو سره د مرستې په موخه پاتې کېږي. افغان ځواکونه اوس باوري دي چې نړیواله ټولنه ورسره ده. د هلمند په اړه واقعیت دا دی، چې موږ د جګړه ییز فصل په پای کې یو، طالبان غواړي وښيي چې لاسته راوړنه یې لرلې ده. خو د پولیسو او ځانګړي ځواک په ګډون افغان ځواکونه په همغږۍ عمل کوي. موږ به په راتلونکو ورځو کې په ټولو سیمو او ولسوالیو کې د دې ځواکونو د حضور شاهدان و اوسو او طالبان به مات شي.»
جنرال کمبيل دارنگه باور ښيي، چې په افغانستان کې د نوي ولسمشر او نوي ادارې په رامنځ ته کېدو سره به په دې هېواد کې امنيتي او سياسي حالات پر مثبت لوري پرمخ ولاړ شي.
جمهور آژآنس: کابل