پاکستان په شمالي وزیرستان کې د عملیاتو پرېکړه کړې

رپوټونه وايي، د پاکستان ملکي حکومت او پوځ موافقه او پرېکړه

کړې چې د وسله والو طالبانو په وړاندې به په شمالي وزیرستان کې عملیات وکړي.
د جمهور آژانس د خبر له مخې د پاکستان د لومړي وزیر نواز شریف تر مشرۍ لاندې د پاکستان د ملي امنیت شورا د تېرې ورځ په غونډه کې لوړپوړو پوځي چارواکو د عملیاتو د څرنګوالي په اړه معلومات وړاندې کړل او پر کورني امنیت او سیمه یزه وضعیت یې خبرې اترې وکړې.
په دغه غونده کې د کورنیو چارو وزیر چودري نثار علي خان، د ملي امنیت سلاکار سرتاج عزیز، د پوځ لوی درستیز راحیل شریف، او د هوايي، مځکني او سمندري ځواکونو عمومي قومندانانو ګډون کړی وو.
د نواز شریف ویاند ویلي، چې په دې غونډه کې د ترهګرو پېښو او د پاکستان د ملي امنیت په اړه غور وشو، او دغه راز د قبایلي سیمو، کراچۍ او بلوچستان پر حالاتو هم خبرې وشوې.
نوموړي پاکستاني رسنیو ته ویلي په دې غونډه کې پرېکړه وشوه چې په شمالي وزیرستان کې به د ترهکرو پرضد عملیات کېږي.
د پاکستان حکومت او پوځ دغه پرېکړه پر داسې مهال کوي، چې درې ورځ وړاندې کراچۍ په هوايي، ډګر، په بلوچستان تفتان کې پر زیارت کوونکو او دغه راز په شمالي وزیرستان کې پر پوځیانو مرګوني ځانمرګي بریدونه وشول، چې له امله یې تر شپېتونو زیاتو سرتېرو او ولسي وګړو ته مرګ ژوبله واوښته.
که څه هم د پاکستان ملکي حکومت تر دې وړاندې په شمالي وزیرستان کې د عملیاتو مخالفت کاوه خو دا لومړی ځل دی، چې په یوه غونډه کې د دې عملیاتو د ترسره کېدو پرېکړه کېږي.
باید وویل شي چې له دې وړاندې هم په یوه غونډه کې د پاکستان د پوځ لوی درستیز جنرال راحیل شریف د پاکستان پر لومړي وزیر نواز شریف د عملیاتو د مخیوي په برخه کې نیوکه او غږ یې کړی وو چې نور د وسله والو طالبانو سره خبرې بس دي.
د شریف له دغه څرګندونو وروسته پاکستاني طالبانو خبردارۍ ورکړ، چې که پوڅ په شمالي وزیرستان کې عملیات وکړي، نو دوی به غاښ ماتونکی ځواب ورکړي.
د پاکستاني طالبانو ویاند شاهدالله شاهد عربي رسنیو ته د کراچۍ د برید مسؤولیت په غاړه اخستی و، او ویلي و، چې دا برید یې په شمالي وزیرستان د پوځ د عملیاتو، د هغوی د مشر حیکم الله مسعود د وژنې او دغه راز په زندانو کې له زندانیانو سره د ناوړه چلند په بدل کې کړی دی.
هغه خبردارۍ ورکړ چې که پوڅ په شمالي وزیرستان کې عملیات وکړي، نو دوی به په نېږدې راتلونکې کې د کراچۍ برید ته ورته نور بریدونه هم وکړي.
جمهور آژانس: کابل